ILOILO CITY– Ginapakamalaot sang Police Regional Office 6 ang ginhimo nga pagpangsunog sang mga katapo sang New People’s Army sa Wilkinson Construction Batching Plant sa Brgy. Igcocolo, Guimbal, Iloilo.
Sa interview sang Bombo Radyo kay Police Lt. Col Joem Malong, tagpamaba sang Police Regional Office 6, iya ginpahayag nga halos pareho ang sahi sang arson cases nga nagakatabo sa bug-os nga rehiyon.
Suno kay Malong, ang rebelde nga grupo gid lamang ang may ikasarang nga maghimo sang kalakasan.
Indi lang ang kumpaniya ang nahalitan suno kay Malong kundi lakip na ang mga pumuluyo.
Santo sa imbestigasyon suno kay Malong, nakabatun na nga daan sang extortion letter gikan sa New People’s Army ang kumpaniya humalin sang tuig 2017 kag ang pinaka-ulihi diri amo ang extortion letter nga ginpadala sang nakaligad nga Pebrero subong nga tuig.
Nahibaluan nga nagsulod sa batching plant ang ginabanta 15 ka mga armado nga kalalakihan nga naga edad 20 tubtob 30 anyos, gintipon ang tanan nga mga trabahor, ginbubuan sang gatong ang duha ka mixer kag backhoe kag gilayun ini nga ginsunog.
Matapos ang insidente, gilayun man nga nagpalagyo padulong sa banwa sang Tubungan ang mga suspek.
