ILOILO CITY – Mas ginapabaskog pa sang Police Regional Office (PRO)- VI ang kampanya batuk sa ilegal nga droga.
Sa interview sang Bombo Radyo kay Police Lieutenant Colonel Arnel Solis, spokesperson sang PRO VI, iya ginpahayag nga ginatutukan pagid nila ang kampanya batuk sa iligal nga droga kasunod sang sunud-sunod nga mga drug buy-bust operation sa rehiyon.
Dugang pa ni Solis, ang pagsolbar sang problema sa iligal nga droga ang nagakinahanglan sang whole-of-government approach kag dako ang papel sang mga pumuluyo.
Ini bangud nga mahimo nga ma-report sang pumuluyo ang nahibaluan nila nga impormasyon sa iligal nga droga.
Mahimo nga mapalab-ot sa Barangay Anti-Drug Abuse Council (BADAC), sa pinakamalapit nga police station kag sa barangay officials.
Pahayag dugang ni Solis, kun indi nila ini ma-report, sila man sa gihapon ang maapektuhan.
