ILOILO CITY – Nagpangayo sang pasaylo ang Police Regional Office VI sa mga pumuluyo nga wala gid nakasulod ukon nabudlayan sa pagsulod sa Iloilo City Proper area kadungan selebrasyon sang Iloilo Dinagyang Festival 2023.
Sa Forbes Bridge, tuman ka laba ang pila sang mga tawo nga gusto nga magsulod sa syudad bangud sang istrikto nga pagsulundan sang public safety sector.
Sa interview sang Bombo Radyo kay Police Regional Office VI director Police Brigadier General Leo Francisco, iya ginpahayag nga nakita man niya ang sitwasyon apang kinahanglan ini nga ubrahon sang kapulisan.
Suno pa sa iya, kinahanglan ang maid-id nga inspeksyon agud nga mapasiguro nga wala sang may makalusot nga kontrabando.
Ginpahayag dugang ni Francisco nga nasunod ang ginplano nga security arrangement.
Apang suno sa iya, wala man sang pamahog nga nabaton ang kapulisan.
Nagpasalig naman ang natungdan nga hatagan sang solusyon ang amo nga concern sa masunod nga deployment.
