BACOLOD,CITY– Nadakpan sa akto ang isa ka police trainee nga naga gamit sang iligal nga droga sa iya nga boarding house sa Lacson St. Brgy.31, Bacolod City.
Ang police trainee ginkilala nga si Patrol Man Brin Jesta Gimotea, 32 anyos sang Bacolod city Police Station 1.
Narekober sa iya nga posisyon ang duha ka improvised rolling type marijuana nga nagabalor P700.
Sa interview sang Bombo Radyo kay Police Regional Office 6 Director Police Brigadier General Rene Pamuspusan, iya ginpahayag nga luyag nya pasidunggan si Police Master Sgt. Emmanuel Alunsagay ang training officer kag nakadakop man sa nasambit nga Patrol man bangud wala sini gin tolerar ang iligal nga buluhaton sang iya nga Police Trainee.
Suno kay Police Brigader General Pamuspusan, ini ang kabahin man sa ginduso nila nga internal cleansing sa Philippine National Police kun sa diin ila mas pabaskugon ang pwersa sang kapulisan paagi sa pag limpyu kag pagkakas sang tanan nga mga pulis nga imbolbado sa mga iligal nga buluhaton.
Sa subong magapa idalom na si Patrol Man Gimotea sa termination proceedings kag indi na maka padayon pa sa iya nga police training.
