Hugot nga ginapamatukan sang pamunuan sang Panay Alliance of Riding Enthusiasts (PARE) ang ginaduso nga rekomendasyon sang Iloilo City Police Office (ICPO) sa pagbutang sang mga numero sa helmet sang mga motorista sa syudad sang Iloilo.
Matandaan nga ini ang nakit-an sang ICPO nga isa sa mga solusyon agud madasig nga makilal-an ang motor-riding suspect ukon masolbar ang krimen.
Sa interview sang Bombo Radyo kay Carlo Shane Torque Eyao, presidente sang PARE, iya ginpahayag nga kadam-an sa ila nga mga motorista ang indi pabor sa nasambit nga rekomendasyon sang ICPO.
Suno kay Eyao, magluwas sa posibilidad nga magastuhan sila sa pagpabutang sang sticker sa ila motorsiklo, nagapati man sila nga indi ini ang solusyon sa pagsolbar sang kriminalidad angot sa motor-riding incidents sa syudad.
Pahayag ni Eyao, posible nga i-peke pa sang mga motor-riding suspects ang numero sang ila sticker sa helmet sa tion nga magplano ang mga ini sa pag-obra sang krimen.
Panugyan sang natungdan, mas maayo nga tutukan sang mga otoridad ang pagpasangkad sang police visibility nga amo ang ginapatihan nila nga pinaka-epektibo nga pamaagi sa pagtapna sang krimen sa syudad sang Iloilo.
