ILOILO CITY – Naghatag si Iloilo City Mayor Jerry Treñas sang isa ka semana sa bag-o nga director sang Iloilo City Police Office agud nga maka-adjust kag maka-organisa ang iya mga plano.
Sa interview sang Bombo Radyo kay Treñas, iya ginpahayag nga sapulon niya liwat sa masunod nga semana si Police Colonel Uldarico Garbanzos kag ang mga station commanders agud maistoryahan dugang ang peace and order sa syudad sang Iloilo.
Ginpakigbahin man ni Treñas ang iya kalipay bangud tumandok gid sang syudad sang bag-o nga ICPO director.
Si Garbanzos ang assigned anay sa ICPO Operations Section kag nangin hepe man sang mga distrito sang Molo, Arevalo, Mandurriao, kag La Paz.
Nangin pinuno man siya anay sang Iloilo City Mobile Group kag nangin deputy city director man for operations.
Suno kay Treñas, mas nakahibalo gid si Garbanzos sang mga problema sa syudad.
Lakip sa inisyal nga naistoryahan sang alkalde kag sang bag-o nga ICPO chief amo ang peace and order, pagsolbar sa motorcycle-riding incidents, kag iban pa nga sarang ma-provide nga equipment sang Ilolo City Government agud mapadasig pa ang operasyon sang pulis.
Suno naman kay Iloilo City Councilor Jojo Javellana, chair sang Committee on Peace and Order, subong pa nga adlaw maga-courtesy call sa iya si Garbanzos.
Ang initial nga marching order sang konsehal amo man ang pagsolbar sang krimen involving riding-in-tandem suspects, pagtutok sa peace and order, pagkampanya batok sa iligal nga droga, kag pagpasangkad pa gid sang police visibility bilang kabahin sang crime prevention.
