Ginatan-aw sang isa ka political analyst nga nagnubo ang political capital ni Manila Mayor Isko Moreno-Domagoso matapos ang ginpangbuy-an sini nga mga tinaga batok sa iya kasumpong sa presidential race nga si Vice President Leni Robredo.
Magluwas nga si Isko ang nagpahayag mismo nga dapat mag-isol si Robredo sa iya presidential bid, si Isko man ang nagpahayag nga naga-dirty play ukon mahigko ang paagi sang bise-presidente sa pag-away para sa iya nga kandidatura.
Sang natapos ang kontrobersyal nga joint press conference sang nagligad nga Easter Sunday, lunsay nagpahayag sanday Senador Manny Pacquiao kag Senador Ping Lacson nga WALA SILA nanawagan nga mag-withdraw si Robredo.
Ginpanindugan nanday Pacquiao kag Lacson nga personal ini nga opinyon ni Isko.
Mangin ang runningmate ni Isko nga si Dr. Willie Ong ang nagapanindugan man nga wala sang dapat mag-atras sa presidential race.
Sa interview sang Bombo Radyo kay Atty. Joenar Pueblo, political law professor sa University of San Agustin – College of Law kag isa man ka political analyst, iya ginpahayag nga sa baylo nga maporma ni Isko ang pang-masa kag pinasahi nga paagi sang liderato, nag-guwa subong nga nang-bully ini sang iya nga kasumpong.
Isa man sa ginmuno sang publiko sa mga statement ni Isko sang nagligad nga presscon amo ang tono sini nga daw ginapakanubo si Robredo bangud isa ini ka babayi.
Sa napulo ka candidates sa 2022 presidential elections, nagaisahanon nga babayi si Robredo.
