Nagpaandam ang isa ka political law expert tuhoy sa mga temprano nga palatandaan sang ginatawag nga “lame duck” effect sa administrasyon ni President Ferdinand “Bongbong” Marcos Jr., kasunod sang mga pagbag-o sa pulitikal nga eksena kag amat-amat nga pagluya sang suporta gikan sa pila ka kaalyado.
Sa interview sang Bombo Radyo kay Atty. Joenar Pueblo,isa ka Bombo Abogado, iya ginpahayag nga amat-amat na nagatuhaw ang mga indikasyon sang pagbuhin sang impluwensiya sang presidenten bisan pa nga may nabilin pa nga halos tatlo ka tuig sa iya nga termino.
Kalakip sa mga obserbasyon ni Pueblo amo ang pagsaylo sang atensyon sang iban nga mga pulitiko kun sin-o ang masunod nga mangin presidente.
Ginsiling man ni Pueblo nga kaangay nga wala na nahadlok sa presidente ang iban nga mga kaalyado sini kag amat-amat na nga nagadampig sa sin-o man nga sa ila pamatyag mabaskog ang tsansa nga mangin masunod nga pinakamataas nga lider sang pungsod.
Suno pa kay Pueblo, ini sa pihak sang pagtinguha sang presidente nga makabilin sang legasiya kun magpanaog na ini sa pwesto sa 2028.
