Patay ang isa ka political vlogger nga si Mimaa Alicia matapos ginluthang-patay sang wala pa makilal-an nga mga suspetsado sa Caloocan City kahapon nga adlaw sang Byernes, Hulyo 17.
Bangod sang madamo nga igo sang bala sa ulo kag lawas, napatay gilayon ang biktima samtang, napilasan man ang iya live-in partner.
Suno sa pulisya, bag-o lang nakapauli ang mag-live-in partner sa ila ginadayunan sang ginpangluthang ang mga ini sang mga suspetsado nga nagsakay sa motorsiklo samtang ginapark nila ang ila salakyan.
Padayon pa ang imbestigasyon sang mga awtoridad agud makilala ang mga suspek kag mahibaluan ang motibo sang krimen.
Isa sa mga anggulo nga ginalantaw amo ang posible nga kaangtanan sang mga ini sa Negosyo ukon sa bangud sa pagka-political vlogger ni Alicia.
Nakilala si Alicia pinaagi sa iya YouTube channel nga “Mimaa Alicia Talks,” kun sa diin nagahatag siya sang mga komentaryo nahanungod sa pulitika kag mga nagakalatabo sa subong.
Padayon ang imbestigasyon sang kapulisan agud madakpan kag mapasabat ang mga responsable sa pagpatay sa mga ini.
