ILOILO – Naga-init na ang pulitika sa probinsya sang Iloilo.
Sa exclusive interview sang Bombo Radyo kay Former Iloilo 1st District Representative Richard Garin, iya ginpahayag nga nagalibot man ini sa probinsya sang Iloilo agud magpadayon sa serbisyo publiko.
Suno kay Garin, ginakalipay sang ila pamilya nga maghatag sang bulig sa pumuluyo.
Pahayag ni Garin nga indi limitado ang serbisyo publiko sa mga opisyal kag katapo sang gobyerno gani mas pilion niya ini bisan diin siya ibutang nga pwesto.
Indi man imposible suno sa anay mamalidha nga mangin isa ini ka elected official. Samtang ginpahayag man ni Garin nga ang tanan sa pulitika ang may posibilidad.
Posible suno sa iya nga may mga pagkontrahanay ang mga dalagko nga pangalan sa politika sa probinsya sang Iloilo apang may yara man nga maga-updanay.
Hugot man ang pagpati sang natungdan nga magaupdanay sa gihapon sa maabot nga pagpiniliay ang apat ka mga mamalidha nga sanday Iloilo 2nd district Representative Michael Gorriceta, Former Iloilo 4th District Representative Ferjinel Biron, Iloilo 5th District Representative Raul “Boboy” Tupas, kag Iloilo 1st District Representative Janette Garin.
Pahayag ni Garin nga kun sang una nagapaminsar ini sang para sa iya kaugalingon, subong ang kaayuhan na lang sang tanan iya ginakabig nga labing importante.
Dugang pa sang natungdan nga ang pag-intra sa pulitika ang nagakinahanglan sang politically matured nga indibidwal.
