ILOILO CITY – Nagalab-ot sa P25 million ang pondo para sa Dinagyang Festival 2020 nga igadumala sang Iloilo Festivals Foundation Inc.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginahulat na lang nga mapirmahan ang Memorandum of Agreement sa tunga sang Iloilo City Government kag sang Iloilo Festivals Foundation Inc.
Suno kay Treñas, ang P15 million ang iga-release sa Oktubre tubtub Disyembre 2019 samtang ang dugang nga P10 million ang iga-release sa Enero 2020.
Ginpahayag ni Treñas nga ang walo ka school based tribe nga magapasakop sa Ati Tribes competition ang may yara na sang guarranteed prize nga P1 million nga cash prize halin sa Iloilo City Government.
Ang champion ang magabaton sang P5 million nga premyo nga ginalakipan sang P1 million nga guarranteed prize, P3 million nga worth of school projects kag P1 million nga cash prize.
Ang second placer ang magabaton sang P3.5 million nga premyo nga ginalakipan sang P1 million nga guarranteed prize, P2 million nga worth of school projects kag P500,000 nga cash prize.
Ang third placer naman ang magabaton sang P2.25 million nga premyo nga ginalakipan sang 1 million nga guarranteed prize, P1 million nga worth of school projects kag P250,000 nga cash prize.
May kaangtanan diri, ginpahayag ni Treñas nga madamu sang aktibidad ang nakalinya may kaangtanan sa pagsaulog sang Dinagyang Festival apang ang pat-ud suno sa alkalde amo nga ibalik ang Religious Sadsad agud nga may partisipasyon man ang pumuluyo.
Magluwas diri, nakadepende na sa Iloilo Festivals Foundation Inc. kun bala mahimo man nga maka-intra sa highlight ang mga barangay based nga tribu.
