ILOILO CITY – Na-transfer na sa account sang Iloilo City Government ang pondo para sa Social Amelioration Program sang Department of Social Welfare and Development.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginahitso na subong sang Department of Social Welfare and Development kaupod ang partner agencies kun paano ipanagtag ang pondo para sa mga benepisyaryo.
Suno kay Treñas, nagalab-ot sa 86,000 ang una nga quota nga ginhatag sang ahensya apang sang ulihi, nagnubo ini sa 79,000.
Ginpahayag ni Treñas nga ginapangitaan man sang paagi nga makabaton sang ayuda ang ginabanta 7,000 ka benepisyaryo nga gindula sa listahan kag dapat hatagan sang ayuda lakip na ang mga nagreklamo nga wala nalakip sa listahan.
Sa subong suno sa alkalde, nagakadapat nga ihatag gilayon ang P6,000 nga cash assistance sang tagsa ka benepisyaryo.
Planu naman sang natungdan nga ipagamit ang tanan nga rapid test kits kag kun may magpositibo, ipaidalom ang pasyente sa isolation kag conformatory test ang pasyente.
Sa pagpaathag ni Treñas, nagakadapat nga ipaidalom sa rapid test ang tanan nga may close contact sa Coronavirus Disease 2019 (COVID-19) patient nga sakay sang barko halin sa Cebu kag nagdungka sa syudad sang Iloilo sang damlag lang.
Indi na dapat nga magbasulay pa suno sa alkalde kun sin-o ang may kapaltahan sa pagpauli sang mga Overseas Filipino Workers kag sa baylo, pangitaan na lang sang sulusyon agud nga indi na madugangan ang COVID-19 patients.
Magluwas diri, padayon man ang COVID-19 response sang syudad kasubong sang pagpanghatag sang food assistance kag Personal Protective Equipment, pag-istrikto sa border restrictions kag ang pagpatuman sang weekend block-off.
Wala naman sang problema suno sa alkalde ang nangin desisyon sang Inter-Agency Task Force nga ipalayag ang detalye sang mga COVID-19 patients para sa mas madasig nga contact trracing.
