ILOILO – Makabaton sang P5,000 nga cash assistance ang tagsa ka asymptomatic COVID-19 patient nga magapaidalom facility quarantine sa 1st district sa probinsya sang Iloilo.
Sa interview sang Bombo Radyo kay Iloilo 1st District Cong. Janette Garin, iya ginpahayag nga ang nasambit nga ayuda ang magahalin sa pondo sang District Representative kag sang Department of Social Welfare and Development.
Suno kay Garin, ang Department of Labor and Employment naman amo ang magahatag sang bulig sa tagsa ka Local Government Unit paagi sa Tupad Program kag Government Internship Program.
Ginpahayag ni Garin nga ang mga private donors ang nagdesisyon nga magpatigayon sang Pooled PCR Testing sa 1st District kag nagalaum ang natungdan nga ini ang mapatuman sa bug-os nga pungsod.
