Ginhingadlan ni Pope Francis ang 14 ka bag-o nga mga Santo sa isa ka canonization ceremony sa Saint Peter’s Square sa Vatican sa atubang sang linibo ka mga tumuluo nga Katoliko halin sa bilog nga kalibutan.
Ang canonization amo ang katapusan nga tikang sa pagka-Santo sandig sa Catholic Church kasunod sa beatification.
Tatlo ka mga kondisyon ang kinahanglan lab-uton kun sa diin dapat nga ang kada indibidwal ang nakahimo sang duha ka milagro; patay na ini sa sulod sang at least lima ka tuig; kag dapat nga maayo nga ehemplo ang iya kabuhi bilang Kristiyano.
“We enroll them among the saints, decreeing that they are to be venerated as such by the whole Church,” pahayag sang Santo Papa matapos ginpanglawag ang mga pangalan.
Lakip sa grupo nga nahingadlan amo ang 11 ka mga indibidwal nga kilala nga “martyrs of Damascus” nga napatay na ginabanta 160 ka tuig na ang nagligad.
Sila ang ginpatay sang Druze militants sang July 1860 sa kapital sang Syria nga napaidalom anay sa Ottoman rule. Ginpatigayon ni Pope Pius XI ang beatification sa ila sang 1926.
Daku ini nga bagay bangud ang Damascus ang kilala nga isa sa pinakadumaan nga Christian communities sa kalibutan apang ang populasyon sang mga Kristiyano diri ang nagdangat na lamang sa dos porsyento subong sandig sa record sang Vatican.
Kadam-an sang mga pumuluyo sa lugar ang nagbiya halin sang nagsugod ang civil war sa Syria sang 2011.
Lakip man sa ginhingadlan ni Pope Francis amo ang tatlo nga napatay sang temprano nga bahin sang 20th century nga nagtukod sang religious communities. Ini amo ang Italian missionary nga si Giuseppe Allamano, Italian nga madre nga si Elena Guerra kag ang Canadian nga si Marie-Leonie Paradis.#
