Gin-anunsyo sang Vatican nga maga-donar si Pope Francis sang apat ka mga ambulansya sa Ukraine agud magamit sa front lines samtang nagapadayon ang giyera batok sa Russia.
Suno sa Vatican, ang tanan nga ambulansya ang may sulod nga nagakaigo nga medical equipment para nga makaluwas sang kabuhi sang tawo.
Ginpahayag pa nga sa sini nga Semana Santo, luyag sang Santo Papa nga maghimo sang “gesture of closeness” sa isa sa mga lugar nga nagabatyag subong sang tuman nga kasakit bangud sa gyera nga naglawig na sang tatlo ka tuig.
“The Holy Father has decided once again to send his almoner to Ukraine to offer four ambulances, equipped with all medical equipment necessary to save human lives, which will be intended for war zones,” suno sa Vatican. “In this time of Easter rebirth, the pope wanted to make a gesture of closeness in one of the most painful places where the war has been raging for three years, the martyred Ukraine.”
Nag-umpisa ang invasion sang Russia sadtong Pebrero 2022.
Halin sang amo nga tion, naka-donate na ang Pope sang generators, pagkaon, bulong, tatlo ka mga ambulansya, isa ka hospital van, kag mga ultrasound machines sa mga ospital nga gina-igu sang military strikes.
Sulit-sulit man nga nagapanawagan ang 88-anyos nga Santo Papa nga tapuson na ang gyera; kag apisar nga wala sang ceasefire nga nalab-ot tubtub subong, nakabulig ang Vatican nga mapatigayon ang pagbayluhanay sang Kyiv kag Moscow sang mga preso.
