ILOILO CITY – Pagkatapos sang pila ka beses nga pag-postpone sang pila ka mga official visits bangud sang ginabatyag nga sakit sa tuhod, magapadulong sa Canada si Pope Francis para sa historic nga anum ka adlaw nga pagbisita sa diin, siya ang ginalauman nga magpangayo sang pasaylo sa Indigenous survivors sang pagpang-abuso nga ginhimo sa residential schools nga ginapadalagan sang Catholic church.
Ini ang ginatawag sang Santo Papa nga “penitential pilgrimage” nga ginapanan-aw nga isa ka importante nga tikang agud nga ma-address ang global scandal sang clerical sexual abuse sa mga kabataan kag pila ka dekada nga cover-up.
Ini ang madugay naman nga ginahulat sang indigenous communities sang Canada.
Pagasuguran ni Pope Francis ang iya ika-37 nga trip sa Edmonton sa western province sang Alberta antes magpadulong sa Quebec City kag sa Iqaluit City.
Nagaplano nga i-reiterate ang pagpangayo sang pasaylo nga gin-deliver sa Canadian delegations nga nagbisita sa Vatican sang Abril nga ginalauman niya nga makabulig sa journey sang ‘healing and reconciliation’.
Ang pagkadiskubre sang nagligad nga tuig sang ginatos ka mga Indigenous children sa mga wala namarkahan nga mga site sa state schools nga gina-administer sang Catholic Church ang nagpwersa sa Canada nga komprotahon ang failed policy sang forced assimilation.
Nagdangat sa ginabanta 150, 000 ka mga First Nations, Metis kag Inuit children ang nag-enroll sang late 1800s to 1990s sa 139 residential schools sa diin, binulan tubtob tinuig sila nga ginpreso kag malayo sa iya pamilya, lenggwahe kag kultura.
Madamo sa ila ang ginsakit kag gin-abuso sexual sang mga headmasters kag mga manunudlo.
Linibo ang ginapatihan nga napatay bangud sang balatian, malnutrition ukon ginpabay-an.
Masobra naman sa 1,300 unmarked graves ang nadiskubrehan humalin sang May 2021 sa mga sites sa mga eskwelahan.
