Gin-anunsyo sang Vatican nga magapakigkita kag makig-istorya si Pope Francis sa mga lider sang United States, Ukraine, France kag India kadungan sang iya pagtambong sa Group of 7 ukon G7 summit sa Borgo Egnazia sa Italya.
Sa isa ka adlaw nga appearance sang Santo Papa, nalakip diri ang bilateral meeting kay US President Joe Biden nga isa man ka Katoliko kag pagasundan sang one-on-one meetings kaupod kanday Volodymyr Zelenskyy sang Ukraine; Emmanuel Macron sang France; Narendra Modi sang India kag iban pa.
Pagasundan ini sang one-on-one meetings kaupod kanday Luiz Inacio Lula da Silva sang Brazil; Justin Trudeau sang Canada; Recep Tayyip Erdogan sang Turkey; William Ruto sang Kenya; Abdelmadjid Tebboune sang Algeria kag ang head sang International Monetary Fund nga si Kristalina Georgieva.
Hunyo 13-15 ang schedule sang sini nga summit nga ginapasakupan sang Italya, United States, Canada, France, the United Kingdom, Germany kag Japan.
Magatambong man ang mga presidente sang European Council and Commission kag leaders sang pila ka States kag International Organizations matapos nga ginpadal-an sang Italya sang imbitasyon.
Si Pope Francis amo ang labing-una nga Santo Papa nga magapakigbahin sa diskusyon sang G7.
Ginapahayag nga partikular sini nga pasakupan ang session kun sa diin hambalan ang Artificial Intelligence (AI) sa adlaw sang Byernes (oras sa Italya).
Sang Enero, matandaan nga nagpaandam na ang Santo Papa sa mga halit nga posible dal-on sang AI kag nagpanawagan man sang international treaty para sa regulasyon sa sini nga teknolohiya. Matandaan nga isa man siya sa nangin biktima sang AI sang nagligad sang naglapta ang iya deepfake images nga nagasuksok sang jacket kag may crucifix nga gintawag sang iban nga “Balenciaga Pope” — litrato nga nakaangkon sang minilyon ka reaksyon kag ginpatihan sang iban nga matuod.
