Ginpabasa sang Vatican sa publiko ang kaundan sang katapusan nga hingyo ni Pope Francis antes ini ginbawian sang kabuhi.
Sa Spiritual of Testament nga gin-release kaina man sang kaagahon oras sa Pilipinas, nagpahayag ang Santo Papa nga ilubong siya sa iya pinalangga nga basilica sa Roma nga amo ang Santa Maria Maggiore.
Nag-request man ini nga mangin simple lang ang iya lulubngan, wala na sang mga dekorasyon, kag butangan lang sang pangalan nga Franciscus.
Ginsiling sini nga sa iya bilog nga kabuhi kag sa iya ministry bilang pari kag obispo, ginsalig gid niya ang iya kabuhi sa Blessed Virgin Mary.
Ginbalikan man sini nga masami gid siya nagakadto sa ancient Marian sanctuary sa kada pag-umpisa kag pagtakop sang iya Apostolic Journey, bangud ginapalab-ot niya ang iya intensyon sa Immaculate Mother, kag nagapasalamat man sa iya pagtatap bilang isa ka Iloy.
Partikular man sini nga ginhingyo nga ibutang ang iya bangkay sa tunga sang Pauline Chapel (Chapel of the Salus Populi Romani) kag Sforza Chapel of the Basilica. Para mas klaro, may ginbutang pa gid ini nga diagram ukon plano.
Pahayag pa sang Pope, ang gasto sa lubong ang covered na sa ihatag sang benefactor nga iya na na-arrange nga isaylo sa Papal Basilica of Saint Mary Major. Gindugang sini nga nakahatag na siya sang instructions kay Cardinal Rolandas Makrickas, Extraordinary Commissioner sang Liberian Basilica.
“May the Lord grant a fitting reward to all those who have loved me and who continue to pray for me. The suffering that has marked the final part of my life, I offer to the Lord, for peace in the world and for fraternity among peoples,” pahayag sini.
Ini nga Spiritual Testament ang ginsulat sang Santo Papa sang Hunyo 29,2022 samtang yara sa Santa Marta — sang tion nga suno sa iya nabatyagan na niya ang paghinunod sang iya kabuhi.
Ginbawian siya sang kabuhi 7:30 sang Lunes sang aga oras sa Vatican, isa ka adlaw matapos ang Easter Sunday.#
