Ginsorpresa ni Pope Francis ang mga tumuluo sa Vatican matapos ini nagsulod sa St. Peter’s Square sakay sa iya wheelchair kag nagtamyaw sa tanan.
Ini ang una nga public appearance sang 88-anyos nga Santo Papa halin sang nakaguwa ini sa ospital sa Roma duha ka semana na ang nagligad.
Nagpakita ang Pope sang natapos na ang misa para sa Jubilee year sang Catholic Church nga parte sang special celebration bilang pagkilala sa healthcare workers kag mga naga-balatian.
Naghinugyaw ang mga tawo sang yara na si Pope sa main altar sang main altar, nagyuhom ini, nagbayaw ini sang kamot agud tamyawon ang tanan, kag nagsiling nga “Happy Sunday to everyone, thank you so much!”
Mahinay gihapon ang tingog kag may gamay man nga hose sa iya ilong nga nagabulig sa iya pagginhawa, apang talalupangdon nga mas mabaskog na ini ipaanggid sang nagligad nga Marso 23 sang nagpakita man siya sa publiko antes magguwa sa Gemelli Hospital.
Sa kinaandan, sang maayo pa ang iya lawas, si Pope Francis gid ang nagapanguna sa noon-time prayer sa St. Peter’s Square sa kada Domingo.
Wala na niya ini nahimo halin sang Pebrero 9 bangud sa paglain sang iya pamatyag; gindala siya sa ospital sang Pebrero 14; kag masobra isa ka bulan nga nagpabulong bangud sa bronchitis nga sang ulihi nag-develop sa double pneumonia.
Sa 38-ka-adlaw sini nga pagtinir sa ospital, una na ginpahayag sang mga doktor nga diutayan lang ini mapatay kag ginkonsiderar na sang medical team nga untaton ang treatment agud pananglitan nga matabo gid man nga mabawian ini sang kabuhi, magabiya ini nga may kalinong.
Nakaluwas ang Pope kag nakabalik na sa Vatican apang gin-abisuhan sang mga doktor nga magpahuway sang duha ka bulan kag indi anay magbaton sang dalagku nga meetings.#
