Nagpanawagan si Pope Francis sa international community nga himuon ang tanan nga posible nga lihok agud nga pauntaton ang nagalala nga away sa Lebanon.
Kadungan ini sang iya mensahe sa weekly audience St. Peter’s Square sa Vatican kun sa diin ginpahayag sini nga indi mabaton ang amo nga gamo.
“I am saddened by the news coming from Lebanon, where in recent days, intense bombings have caused many victims and destruction,” suno sa Santo Papa.
Kasunod ini sang pagpatigayon sang Israel sang air strikes sa amo nga pungsod sa Middle East kun sa diin gina-target nga iguon ang tanan nga ginahukmungan sang militante nga grupo nga Hezbollah kag ginatuyo man nga papason ang tanan nila nga armas.
Halin sang Lunes sang aga, masobra na sa 560 ka tawo ang napatay lakip ang 50 ka mga kabataan kag 1,835 naman ang napilasan suno sa Lebanese Health Ministry.
Masobra man tunga sa milyon ka mga tawo sa Lebanon ang nagtal-as suno sa Foreign Ministry bangud sa paandam sang Israel nga magapadayon ang airstrikes kag dapat magpalayo ang mga sibilyan sa posisyon sang mga militante na grupo.
Sa kapital nga Beurut, ang mga tawo halin sa southern Lebanon ang nagapanago subong sa mga eskwelahan kag sa iban pa nga mga building.
