Napuno sang mga tawo ang dalan halin sa St. Peter’s Square sa Vatican City padulong sa St. Mary Major Basilica kadungan sang pagdala sang bangkay ni Pope Francis sa iya katapusan nga palahuwayan.
Sa interview sang Bombo Radyo kay Fr. Gregory Gaston, Rector sang Pontificio Collegio Filippino, iya ginpahayag nga linibo ka mga tawo ang naghatag sang katapusan nga pagtahod sa nagtaliwan nga lider sang Simbahan Katoliko nga si Pope Francis sa sulod sang tatlo ka adlaw nga public viewing sa St. Peter’s Basilica sa Vatican City sa Rome, Italy.
Suno kay Fr. Gaston, halin sa mga katoliko nga tumuluo gikan sa nagkalain-lain nga pungsod tubtob sa mga lideres sang simbahan kag pulitika, nagtambong sa pinakaulihi nga misa para sa Santo Papa.
Ginpahayag man sini nga opisyal nga ginsirado ang lungon sang Santo Papa sa liturgical rites antes ginpatigayon ang state funeral sa St. Peter’s Square kag paglubong sa bangkay sini sa basilica saguwa sang Vatican.
Nahibaluan nga yara sa 200,000 ka tawo ang nagtipon sa St. Peter’s Square kag tubtob sa 300,000 pa gid sa ruta nga gin-agyan sang bangkay sang nagtaliwan nga Santo Papa.
