Ginsapubliko ni Pope Francis nga nagsuprer ini sang “acute” kag “strong” pneumonia nga amo ang rason sang iya pagka-ospital sang nagligad nga bulan; apang apisar sini, nagpasalig ang Santo Papa nga indi siya mag-untat sa pagbyahe sa iban nga mga pungsod.
Ginpahayag ini sang 86-anyos nga Santo Papa sang nag-abot halin sa Budapest kun sa diin naglawig sang tatlo ka adlaw ang iya nga pagbisita.
Ginbalikan man sini ang iya nga sitwasyon sang nagligad nga bulan nga wala man siya nalipong apang mataas ang hilanat rason nga tatlo ka gab-i gid ang gintinir sini sa ospital sa Roma.
Matandaan nga ini na ang ikaduha nga bes nga na-ospital si Pope Francis halin sang 2021 bangud sa nagaluya na nga health condition.
Ginpahayag man sini nga tuyo pa niya nga magkadto sa Lisbon sa Agusto para sa World Youth Day.
Apisar naka-wheelchair, desidido ini sa pagbyahe kag ang sunod sa schedule sini amo ang trips sa Marseille kag Mongolia. ##
