Ginpaiway ni Pope Francis ang pagtambong sa tuigan nga prusisyon nga ginapatigayon sa Vatican kadungan sang Byernes Santo.
Ini bangud nagapadayon pa sa pag-recover ang 88-anyos nga Santo Papa gikan sa ginsuprer sini nga double pneumonia kag gin-abisuhan man sang iya mga doctor nga magpahuway anay kag maglikaw sa dalagku nga mga pagtilipon.
Ginhiwat ang prusisyon sa Colosseum sa Roma, isa ka outdoor ceremony nga naga-marka sang pagdumdom sang mga Kristyano sa paglansang kay Hesus sa Krus. Ang Via Crucis sa Colosseum — nga ginapatihan nga lugar sang martyrdom sa early Christians — amo ang re-enactment sang kamatayon ni Hesukristo.
Nagbulos-bulos ang mga partisipante sa pag-uyat sang krus samtang nagalakat sila sa dumaan nga Roman arena, kag nagapundo sa pagpangamuyo kag agud pamatian ang mga meditasyon.
Kun matandaan, masobra isa ka bulan nga na-ospital si Pope bangud sa double pneumonia kun sa diin diutayan pa ini napatay samtang ginabulong. Wala man ini anay nagtambong sa amo nga Colosseum event sang 2023 kag 2024.
Apang suno sa Vatican, si Pope ang personal nga nagsulat sang meditations sa seremonya subong nga tuig. Ini na ang ikaduha nga tuig sa iya 12-year papacy nga ginhimo niya ini.
Wala pa sang dugang nga impormasyon kun magatambong ang Santo Papa sa Easter services sa weekend.#
