Ginkumpirma sang Vatican nga dal-on sa ospital si Pope Leo XIV subong nga Martes antes ang ginapreparar nga operasyon agud nga makuha ang gamay nga nodule sa iya baga.
Iga-admit siya sa Gemelli Hospital sa Roma sa Oktubre 13 sang aga (Rome time) apang wala pa sang eksakto nga adlaw nga ginhatag kun san-o siya operahan.
Suno naman sa Prefecture of the Papal Household, ginkanselar anay ang audience sang Santo Papa antes ang pagdala sa iya sa ospital.
Sandig sa ginpahayag sang Pope sang Domingo, ang gamay nga bukol ukon nodule sa iya baga nadiskubrehan sa bag-o lang nga health check-up.
Sa pihak sini, nagpakigkita pa si Pope Leo sa mga obispo halin sa Argentina, Nicaragua kag Estados Unidos, lakip ang iban pa nga opisyal sang Lunes.
Matandaan nga na-eleher si Pope Leo bilang Santo Papa sang Mayo 2025.
Suno sa Vatican, ginapaabot nga magalawig sing mga isa ka semana ang iya pagpahuway kag pagpaayo pagkatapos sang operasyon.
Naghingyo naman ang Catholic Bishops’ Conference of the Philippines (CBCP) sa mga tumuluo nga ipangamuyo ang Santo Papa.
Ang lung nodule amo ang gamay nga bukol ukon parte sang tisyu sa baga nga mahimo nga indi cancerous. Suno sa American Thoracic Society, mas manubo sa lima ka porsyento sang tanan nga lung nodules ang nagakumpirmar nga cancer, apang nagataas ang risgo depende sa edad, kadakuon sang bukol kag iban pa nga mga bagay, lakip ang pagsigarilyo.
