Nagpakigkita si Pope Leo XIV kay Ukrainian President Volodymyr Zelenskiy sa iya nga una nga pribado nga meeting bilang Santo Papa, matapos ang iya inaugural mass sa St. Peter’s Square.
Gintagaan igtalupangod ni Pope Leo sa iya pangamuyo ang ginalauman nga kalinong sa tunga sang duha ka pungsod nga Ukraine kag Russia.
Nagtambong si Zelenskiy kag ang iya asawa nga si Olena Zelenska sa misa, upod sa pila ka lider kag dignitaryo halin sa lain-lain nga pungsod.
Pagkatapos sang misa, nagkamustahanay si Zelenskiy kag Pope Leo, kag nagpadayon sa isa ka pribado nga meeting kaupod si Olena.
Sa video nga ginpagwa sang Vatican, ginpahayag ni Pope Leo nga nalipay siya nga makita liwat ang lider sang Ukraine nga Zelenskiy, kun sa diin nagbayluhanay man sila sang mga regalo nga tradisyonal sa mga opisyal nga pagtililipon sa Vatican.
Sa pareho nga adlaw, duha lang ka pribado nga meeting ang ginhimo sang Santo Papa, ang isa kay President Dina Boluarte sang Peru, pungsod nga una niya nga ginserbisyuhan bilang misyonero sa sulod sang duha ka dekada.
