Nagtanyag si Pope Leo XIV nga magpatunga sa mga lider sang mga nasyon nga may gyera sa tuyo nga mapabalik na ang kalinong sa kalibutan.
Kadungan sini, nagpanawagan man ang Santo Papa sa mga Kristyano nga nagapuyo sa Middle East nga indi pagbayaan ang ila mga puluy-an.
“Who, better than you, can sing a song of hope even amid the abyss of violence?” pahayag sini sa iya speech sa mga katapo sang Eastern Catholic Churches sa Paul VI hall sa Vatican. Ginhinambit sini ang mga lugar kaangay sang Holy Land, Ukraine, Lebanon, Syria, Middle East, Tigray kag ang Caucasus.
Nagpanawagan ini nga magpangamuyo, kag sa iya bahin, nagpasalig ini nga magahimo man siya sang mga tikang agud magpangibabaw ang kalinong.
“The Holy See is always ready to help bring enemies together, face to face, to talk to one another, so that peoples everywhere may once more find hope and recover the dignity they deserve, the dignity of peace… The peoples of our world desire peace, and to their leaders I appeal with all my heart: Let us meet, let us talk, let us negotiate!”
Ang iya speech natabo sa pre-arranged event para sa 2025 Jubilee holy year nga dedikado sa 23 Eastern Catholic Churches nga nalapta sa Eastern Europe, Middle East, India, kag mga parte sang Africa.
Matandaan nga sang nagligad nga semana nagpungko si Pope Leo bilang bag-o nga lider sang Catholic Church kasunod sang kamatayon ni Pope Francis sang Abril 21.
