ILOILO CITY – Ginaduso sang Iloilo provincial government ang pagpatigayon sang Pork Fest 2022 sa mga banwa nga nalakip sa pink (buffer) zone.
Pito ka mga banwa ang sa subong nalakip sa amo nga category.
Sa interview sang Bombo Radyo kay Mr. Gilbert Marin, Iloilo Provincial Tourism Officer, iya ginpahayag nga ang nasambit nga festival ang mangin isa ka venue para sa information campaign nga safe kan-on ang baboy.
Ini ang maga-feature man sang local culinary kun sa diin, ang tagsa ka mga banwa ang mahatagan sang tion agud nga mapakita sang ila mga pumuluyo ang ila pamaagi sang pagluto sang nanari-sari nga putahe sang baboy.
Dugang pa ni Marin, may yara man sang libre nga workshop may kaangtanan sa paghimo sang by-products sang pork.
Ang tatlo ka mga banwa nga nagpabutyag na sang interes amo ang Sta. Barbara, Leon kag Tigbauan.
