Temporaryo nga gindumilian nga makasulod sa Pilipinas ang buhi nga baboy, karne, kag iban pa nga produkto sini halin sa Taiwan.
Ini matapos ang na-report nga outbreak sang African swine fever (ASF).
Ini ang ikaduha nga import source nga gin-ban ang mga produkto sa Pilipinas subong nga bulan kasunod sang Espanya bangud sa kaangay man nga rason.
Suno sa Department of Agriculture (DA), importante ang ban agud nga indi na maglapta kag maghalit sa local hog industriya ang balatian kag indi na magsaka pa ang presyo sang baboy sa mga merkado.
Kaangot diri, ginmandu man ni Agriculture Secretary Francisco Tiu Laurel Jr. ang gilayon nga suspension sang tanan nga pork-derived commodities lakip na ang semen nga ginagamit para sa artificial insemination.
Pahayag sang DA, ginkumpirma sang Taiwan Veterinary Research Institute ang outbreak sa mga baboy sa Taichung City kag gin-report ini sa World Organization for Animal Health sang Oktubre 25.
Gin-revoke naman sang DA ang nauna na gin-aprubahan nga import clearances para sa baboy kag pork products halin sa Taiwan. Suspended man ang bag-o nga mga aplikasyon, kag ginmanduan naman ang veterinary quarantine officers sa major ports nga punggan ang shipments nga nagaunod sang apektado nga items.
