Ginduso sang Pork Producers Federation of the Philippines sa gobyerno nga ipaidalom ang bilog nga Pilipinas sa state of calamity ukon emergency bangud sa liwat kag padayon nga pagsaka sang African Swine Fever (ASF).
Suno kay Nicanor Briones, chairperson sang Pro-Pork kag AGAP Party-list Representative, ini nga tikang amo ang magapahanugot sa gobyerno nga hulagon ang calamity funds para sa vaccination batok sa sini nga balatian sa baboy.
Pananglitan indi ini matapna subong suno kay Briones, magalapta ini, magabalatian ang mga baboy, kag magkalamatay na lang kun maatrasar pa gid ang pagbakuna.
Nahibaluan nga nagapreparar ang Department of Agriculture sang emergency procurement sang ASF vaccines kasunod sang outbreak sa probinsya sang Batangas.
Walo ka mga banwa sa amo nga probinsya ang may aktibo nga kaso sang ASF kun sa diin ang Lobo kag Calatagan ang nakadeklarar na sang state of calamity.
Ginpahayag man sang DA nga 10% sang hog population sang Pilipinas ang naghalin sa Batangas gani kinahanglan gid ini nga proteksyunan para nga masigurado ang pork supply sang pungsod.
Sa pinakauli nga data sang DA, ang current hog population ang nagpanaog sa 9.9 million halin sa 12.7 million antes ang kaso sang ASF sang 2019.
