ILOILO CITY – Liwat nga nagpatuman sang border security checks ang Portugal bilang pag-abi-abi sa pag-abot ni Pope Francis upod ang minilyon ka mga pamatan-on para sa World Youth Day.
Ang “exceptional” measure ang ginpatuman agud nga malikawan ang posible pamahog sa public order kag internal security nga magalawig tubtob sa Agosto 7 suno sa government decision.
Suno kay Interior Minister Jose Luis Carneiro, ang identity checks sa borders ang ipatuman nga random kag indi systematic.
May yara man sang koordinasyon sa Spanish, French kag Italian authorities.
Ginalauman sang Portugal nga maga-upod ang linibo ka mga pilgrims sa bilog nga kalibutan agud nga magtambong sang pagtilipon sang young Catholics umpisa sa Agosto 1 tubtob 6.
Ang nasambit nga kahiwatan ang una nga gin-schedule sang Agosto 2022 apang ginkanselar bangud sang Coronavirus disease 2019 pandemic.
Ang 86 anyos nga si Pope Francis nga naga-recover sa iya surgery sang nagligad nga Hunyo ang nag-confirm na sang iya pagtambong.
Ang lima ka adlaw nga pagbisita sang pinuno sang Catholic church ang markahan sang full agenda nga may ginabanta 20 ka mga meetings kag 11 ka mga speeches.
