Ginkumpirma sang Boston Celtics nga kinahanglan ipaidalom sa operasyon si Kristaps Porzingis bangud sa injury nga naangkon sini kasunod sang ila kampyonato sa 2024 National Basketball Association (NBA) finals.
Suno sa Celtics, nag-suprer ang 7’2″ star sang torn retinaculum kag dislocated posterior tibialis tendon sa Game 2 sang Finals batok sa Dallas Mavericks rason man nga wala ini nakahampang sa Games 3 kag 4 kag nagbalik lamang sa Game 5.
Pahayag pa sang Boston, gusto pa kuntani ni Porzingis nga i-delay ang operasyon bangud kinahanglan sini updan ang Latvia sa ila hampang agud maka-qualify sa Paris Games, apang ang iya naangkon nga injury ang nagabalabag sa iya kondisyon kag indi tupong sa lebel sang hampang nga required para sa Olympic competition.
Bangud sini, nabuhinan sang isa ka daku nga bug-at ang kinahanglan atubangon ang Gilas sa Olympic Qualifying Tournament bangud naka-grupo ang Latvia kag ang Pilipinas sa sini nga tournament sa Riga halin sa Hulyo 2-7.
Apisar nga wala si Porzingis, early favorite gihapon ang world No. 6 nga Latvia sa qualifiers kag amo ang highest-ranked team sa anum ka mga team nga maga-compete sa tournament.
Matandaan nga sa FIBA World Cup pa lamang sang 2023, gintawag na ang Latvians nga “giant killer” bangud apisar debut nila sang amo nga tuig, ginlutos nila ang world No. 5 nga France sa group stage; ang No. 1 kag kampyon sang amo nga tion nga amo ang Spain sa second round; ginlutos man ang world no. 10 nga Italy kag ang world no.8 nga Lithuania antes ini napierde sa isa lang ka possession sa Germany sa quarterfinals nga amo ang dalayon nga nagkampyon sa tournament.
Magluwas sa Latvia, atubangon man sang Gilas ang world No. 23 nga Georgia sa Group A sa OQT.
