Naistoryahan sa Senado ang posibilidad sang pagdagdag sang penalidad sa mga ginikanan sang mga kabataan nga nagapang-bully sa eskwelahan.
Nagtuhaw ang amo nga proposal kadungan sang joint hearing sang Senate Committee on Basic Education kag sang Committee on Finance.
Ginpamangkot ni Senator Bam Aquino, chair sang education committee, kun ano ang mga lihok nga ginahimo sang Department of Education (DepEd) agud matapna ang mga insidente sang bullying.
Ginpahayag sini nga kinahanglan ang mas mabakod nga preventive measures kag mas madasig nga tikang sa pagdisiplina agud nga indi maandan ang kultura sa pagtami-tami sa kapareho nga kabataan.
“How do we go from being the bullying capital to having a zero-bullying policy? Unang-una, yung preventive—mahalaga ‘yan. Dapat alam ng mga tao na hindi dapat ito ginagawa,” suno kay Aquino.
Diri na kag gindala sini ang gina-propose sang iban nga dapat nga mas involved man ang ginikanan kun ang ila kabataan ang nagapang-bully.
“And then yung parents, the parents need to be involved here. May nag-suggest online na baka daw yung magulang kailangan rin ipenalize kapag yung mga anak bully,” suno sa iya.
Suportado naman ni Senator Raffy Tulfo ang ideya nga may sanctions dapat ang ginikanan sang bully kaangay sang community service.
“Tama ka, Mr. Chair, dapat may parusa sa mga magulang. When I say parusa, siguro community service. Tapos ikaw maging janitor sa school,” suno kay Tulfo.
Ginduso man ni Tulfo nga indi dapat “reactionary” ang eskwelahan sa kaangay sini nga mga kaso kundi dapat nga mangin proactive agud nga malikawan nga magluntad ini.
“That’s our problem—we are reactionary. What do you do when you find out that a child has been bullied in a certain school? Do you call the parents?” pamangkot sini. Ginkwestyon man sini kun ngaa nga nakadepende pa ang imbestigasyon sa formal complaints, ilabi na nga may mga biktima nga nahadlok mag-report.
Nagpaathag naman ang DepEd nga ginapabaskog man nila ang ila nga mga programa nga ma-engganyo ang mga estudyante nga mag-intervene kag mag-report kun may nahibaluan sila nga bullying incidents.
Gina-develop man sang ahensya ang parental involvement sa bullying prevention kasunod sang mga rekomendasyon halin sa Second Congressional Commission on Education.
Sandig sa EDCOM II, 63% sang Grade 5 students ang nag-report nga gina-bully sila sang at least isa ka bes sa kada isa ka semana.
Sa hearing, ginplastar man ni EDCOM II technical specialist for basic education Riz Comia nga ang bullying makabig nga “direct driver” sang krisis sa edukasyon sa Pilipinas.
“Frequent exposure to bullying is associated with a significant decline in test scores,” suno kay Comia.
Lakip sa rekomendasyon sang EDCOM II amo ang pagpain sang dugang nga pondo kag personnel para sa anti-bullying programs kag pagbutang sang “discipline officer” position sa mga eskwelahan agud nga makaayo ang student behavior concerns.#
