Magapatigayon sang committee hearing ang Iloilo City Council subong nga adlaw, Enero 22, agud nga maistoryahan ang natuhoy sa hingyo sang cockpit operators nga pahanugutan na ang online bulang sa syudad.
Sa interview sang Bombo Radyo kay Iloilo City Councilor Jojo Javellana, chair sang Committee on Games, Amusement, and Professional Sports sa Iloilo City Council,iya ginpahayag nga patambungon sa pagsinapol ang mga tiglawas sang United Association of Cockpit Owners and Operators of the Philippines Incorporated, tag-iya sang mga bulangan sang syudad, kag may mga tiglawas man nga magahalin sa Department of Health.
Nahibaluan nga santo sa Resolution 79, Series of 2020 sang Inter-Agency Task Force, ginapasugtan ang cockfighting operations sa mga lugar nga yara sa Modified General Community Quarantine apang subject pa sa istrikto nga health kag safety protocols.
Sa idalom sini nga pagsulundan, indi pwede ang in-person audience, online ukon remote betting, kag pati na ang live broadcasting ukon telecasting sang cockfights.
