ILOILO – Ginakabig nga hotly contested ang posisyon sa pagka National Chairman sang Philippine Councilors League samtang nagahilapit ang eleksyon sang bag-o nga set of officers.
Sa interview sang Bombo Radyo kay Philippine Councilors League – Iloilo President Ramon Sullano, iya ginpahayag nga ang eleksyon ang patigayunon sa Pebrero 27 sang hapon apang antes pa man sini, may yara sang national congress sa Pebrero 26 sa SMX Convention Center Manila.
Suno kay Sullano, nagalab-ot sa masobra sa 17,000 ang miyembro sang Philippine Councilors League sa Pilipinas apang ginabanta nga 11,000 lang ang makatambong sa national congress sa diin lakip sa mga makaboto amo ang tanan nga Sangguniang Bayan Member kag Ex-Officio Member.
May kaangtanan diri, ginpahayag sang natungdan nga sa subong, wala pa sang maathag nga kontra si National President Jose Nelson “Tata” Sala Sr. samtang maga-agaway naman sa pagka National Chairman amo sanday Interim Danny Dayanghirang kag Jesciel Richard Salceda.
Santo sa nagalapta nga flyers, si Dayanghirang nga ginapahayag may dugo nga Lambunaonon, ang suportado ni Presidente Rodrigo Duterte samtang ginapahayag nga si Salceda naman ang suportado ni anay Philippine Councilors League National President Luis “Chavit’ Singson.
Kun pamangkuton tuhoy sa kun sin-o ang pagasuportahan sang Iloilo, ginpahayag ni Sullano nga nakadepende na sa iya mga kaupod kun sin-o ang pagabotohon.
