PAVIA, ILOILO – Masobra na sa isa ka siglo nga nangin tradisyon ang pottery-making sa Brgy. Pandac, Pavia, Iloilo.
Sa Good Morning Philippines program, ginpahayag ni Punong Barangay Corazon Pedregosa sang nasambit nga lugar, nga ang pottery-making ang impluwensya sang mga espanyol.
Suno kay Pedregosa, sa subong, tuman na ka layo kun disensyo kag kalidad sang paghimo sang kulon ang pagahambalan.
Ginpahayag ni Pedregosa nga lakip sa mga materyales nga kinahanglan sa paghimo sang kulon amo ang duta nga clay, balas ukon mahimo man nga alternatibo ang abo.
Ang nasambit nga materyales ang ginasimpon, ginamasa kag ginahulma paagi sa Potter’s wheel, ginapainitan ukon ginapahanginan
Sa malawig nga tion, nangin kabahin na sang kabuhi sang mga taga Barangay Pandac ang paghimo sang kulon kag paagi man sa suporta nga ginahatag sang gobyerno, madamo na ang nabuligan sang nasambit nga palangabuhi-an.
Agud nga mas mapasangkad pa gid ang pottery-making sa nasambit nga lugar, ginaduso nila suno sa Punong Barangay ang pagpatigayon sang festival may kaangtanan sa paghimu sang kulon.
