Masobra pa isa ka bulan ang hulaton antes makapatigayon sang inspeksyon sa isa ka poultry farm sa Barangay Monpon, Duenas, Iloilo nga ginareklamo nga amo ang ginaalegar nga ginahalinan sang langaw kag nagaapekto sa mga residente sa palibot nga mga barangay.
Ini ang sabat sang Municipal Environment and Natural Resources Office (MENRO) matapos nga ginpa-Bombo liwat ang sitwasyon sa amo nga lugar nga na-eksperyensyahan man sang nagligad nga tuig.
Naglunsar sang signature campaign ang halos lima ka apektado nga mga barangay. Ang amo nga signature campaign ang ginpalab-ot man sa opisina ni Mayor Robert Martin Pama.
Sa interview sang Bombo Radyo kay Mr. Arturo Repospolo, ang head sang MENRO-Duenas, iya ginpahayag nga nagapanindugan ang tag-iya sang poultry farm nga indi halin sa site ang langaw kag nagapatuman man sila sang mitigating measures.
Suno kay Repospolo, base sa ila nga pag-convene, nakasugtan nga patapuson anay ang stocking period kag ang production sa poultry farm nga posible maglawig sang 36 ka adlaw.
Kun matapos na, dira kag makapatigayon sang inspeksyon ang local government unit kaupod sa Department of Environment and Natural Resources – Environmental Management Bureau (DENR-EMB).
Antes sini, nagkadto na ang EMB sa amo nga farm agud ma-check kun may paglapas sa Environmental Compliance Certificate nga gin-isyu sang talatapan.
Wala sila ginpasulod suno kay Repospolo bangud nagsugod na ang stocking period.
Naghingyo naman ang alkalde nga kun mapatigayon na ang inspeksyon kag kun mapamatud-an nga may violation ang farm, ipasirado anay ini para sa corrective measures.
Kun makit-an naman sang inspection team nga wala man sang violation ang poultry farm, wala sang legal nga basehan suno sa MENRO agud nga ipa-untat ang operasyon sa site.
