Temporaryo nga gin-ban sang Department of Agriculture (DA) ang pagpasulod sang poultry kag poultry products halin sa France bangud sang kumpirmado nga kaso sang bird flu sa amo nga pungsod sa Europa.
Suno sa Memorandum Order 40 ni Agriculture Secretary Francisco Tiu Laurel, Jr., katuyuan sini nga lihok nga maprotektahan ang domestic poultry population batok sa highly pathogenic avian influenza virus.
Sa idalom sang order, ginadumilian ang importation sang domestic kag wild birds halin sa France lakip ang ila mga produkto kaangay sang poultry meat, day-old chicks, itlog, kag semen.
Ginsuspinde man sang Bureau of Animal Industry (BAI) ang processing, evaluation sang application kag issuance sang sanitary and phytosanitary import clearance para sa importation sang nahinambit nga mga produkto.
Sang nagligad nga bulan sang nag-report ang France sa World Organisation for Animal Health nga may outbreak sang H5 HPAI sa Saint-Malo, Ille-et-Vilaine, Bretagne, France sang Agusto 7.
Ini nga kaso ang nagapekto gid sa domestic poultry birds nga ginkumpirma man sang national laboratory sa France.
Nahibaluan nga yara sa 19,252 kilos sang chicken meat products kag 3,900 kilos sang duck meat halin sa France ang ginpasulod sa Pilipinas sa una nga anum ka bulan subong nga tuig.
Masami nga nagapatuman ang Pilipinas sang temporary ban sa trade partners sini nga may confirmed bird flu case bilang panagang agud nga indi na maapektuhan ang domestic poultry population sa mga kaangay nga transboundary animal diseases.
