ILOILO CITY – Makaeksperyensya sang power interruption ang mga konsumidor sa pila ka mga distrito sa syudad sang Iloilo las 12:00 sa tungang gab-i tubtob las 6:00 sa kaagahon sa Pebrero 20, Sabado kag 21, Dominggo.
Ini ang may kaangtanan sa scheduled annual preventive maintenance nga patigayunon sang Panay Power Corporation (PPC), isa sa mga suppliers sang kuryente sang MORE Electric and Power Corporation (MORE Power).
Sa interview sang Bombo Radyo kay Engineer Bong Espanta, assistant vice president kag plant manager sang Panay Power Corporation, iya ginpahayag nga ang mga apektado nga substations ukon feeders amo ang yara sa Mandurriao, Molo, Jaro sa Iloilo City kag banwa sang Pavia.
Magluwas sa MORE Power, mangin apektado man sang power interruption ang ILECO I.
Suno kay Espanta, napilian ang graveyard schedule (12:00 midnight – 6:00 AM) bangud ini ang tion nga manubo ang electrical load.
Ginpahayag ni Espanta nga nag-deploy sila mga personnel agud masapar ang maintenance sa sulod sang anum ka oras sa Pebrero 20 kag 21.
Apang suno sa iya, pakamaayuhon nila nga mapadasig ang maintenance agud mabuhinan ang anom ka nga oras nga power interruption.
Nagpangayo man sang paghangop ang natungdan sa publiko sa huol nga ila matuga.
Una na nga nagpatigayon sang preventive maintenance ang PPC sang Pebrero 14 kag magapadayon pa ini sa Pebrero 20 kag 21 bangud apektado sa gihapon ang duha ka nasambit nga power distributors.
