ILOILO CITY – Ginatugyan sang Panay Electric Company sa sheriff ang pagdesisyon kun ano ang mangin plastada sang electric distribution sa syudad sang Iloilo.
Ini ang kasunod sang impormasyon nga may yara sang pila ka area sa syudad nga wala sang power supply subong nga gab-i.
Sa interview sang Bombo Radyo kay Atty. Boy Alcantara, legal Counsel sang Panay Electric Company, iya ginpahayag nga indi sila makapatigayon sang trouble shooting bangud nga ginakwestyon sang MORE Electric and Power Corporation kun sin-o ang nagadumala sa mga substation ilabi na sa switchboard.
Suno kay Alcantara, kun tani, wala pa sang take-over nga natabo bangud nga may yara pa sang hearing sa Biyernes, agud istoryahan ang tuhoy sa transition period sa tunga sang duha ka kompaniya.
Ginpahayag ni Alcantara nga ang ila ginapakigbato nga kun tani hulaton ang mangin desisyon sang Korte Suprema tuhoy sa issuance of constitutionality antes ang expropriation.
Sa pagkamatuod suno sa natungdan, may yara sang ginkasugtan ang mga legal counsel sang duha ka kompaniya nga indi anay pag i-take-over ang tanan nga substations apang kun magdesisyon ang sherrif nga pahanugutan na ang MORE Power, wala sila sang may mahimo kundi sundon ang mandu.
Samtang, suno naman kay Mikel Afzelius, Corporate Communications Officer sang Panay Electric Company, indi nila mahibalu-an kun sa diin nga mga lugar ang may yara sang power interruption.
Ini bangud nga suno kay Afzelius, may yara matuod sang access ang switchboard apang wala sang may nagamando sa mga personnel nga nagaduty.
Kun tani suno kay Afzelius, ang perosnnel lang anay sang Panay Electric Company ang naga-operate sang swithcboard kag nagaserbe lamang nga observer ang personnel sang MORE Power.
Ang problema lang suno sa natungdan amo nga wala ginasunod sang pihak nga bahin ang addendum sang korte.
