ILOILO CITY- Ginhatagan importansya ni Department of Agriculture (DA) Secretary William Dar ang pagkinahanglan para sa public-private partnership projects agud mapadasig ang pagsanyog sang sektor sang agrikultura may kaangtanan sa pagpasiguro sang food sovereignty sa pungsod.
Suno kay Dar, ini agud matigayon ang build, operate and transfer scheme agud makaganyat sang mas dako nga kwarta gikan sa foreign kag Filipino investors kag amo man ang private sector.
Ginpanawagan man ni Dar sa mga unibersidad kag iban nga academic institutions nga engganyuhon ang mga mamalidha nga mag- provide sang ginakinahanglan nga nagakaigo nga budgetary support sa ahensya agud mabuksan ang bug-os nga potensyal sang Philippine agriculture.
Ginpaathag man ni Dar nga samtang ang food security naangot sa proteksyon sang nagaeksister nga food systems, ang food sovereignty naman nagapatuhoy sa madamo nga components kag tikang agud masolusyunan ang kagutom kag kapigaduhon, lakip na ang produsyon, distribusyon kag pagkonsumo sang actual food system.
