ILOILO CITY – May yara sang negatibo nga epekto sa mental health ang tuman nga exposure sa social media kag sa mga balita may kaangtanan sa Coronavirus Disease 2019 (COVID-19).
Sa Good Morning Philippines program, ginpahayag ni Ken Lerona, Public Relations and Marketing Practitioner, nga kadungan sang ginapatigayon nga Enhanced Community Quarantine, nagakadapat nga sundon ang panugyan ukon abiso sang gobyerno agud nga indi na magdamo pa ang malatnan sang virus.
Suno kay Lerona, normal lamang nga makabatyag sang kaugot, kahangawa ukon indi kumportable bangud sa ginapatuman nga border kag travel restrictions lakip na ang pagpauntat sang transportasyon kag ang pagpasirado sang mga balaklan.
Ginpahayag ni Lerona nga mas makapaayo man nga hibaluon ang fake news kay sa matuod nga balita agud nga indi makatuga sang panic kag kun yara naman sa sulod sang balay, magpaminsar ukon maghimo sang paagi agud nga malingaw.
Indi dapat magbag-o ang pagpangabuhi apisar sang ginapatuman nga Enhanced Community Quarantine apang mas makapaayo nga limitahan ang exposure sa social media, gadgets kag sa pagbasa sang mga balita nga makatuga sang tuman nga problema kag kahangawa bangud nga may yara ini sang negatibo nga epekto sa mental health.
Mas makapaayo man suno sa natungdan nga magpakig-angot ukon mag-istorya sa pamilya, himata ukon sa mga masaligan nga tawo tuhoy sa mga nagakatabo sa palibot.
Ang labing importante suno sa natungdan amo ang pasensya kag ang konsiderasyon sa isig ka pareho.
