Naghatag na sang direktiba si Police Regional Office (PRO) 6 Director Police Brigadier General Jack Wanky sa Iloilo City Police Office nga tutokan ang pag imbestigar sa ila police personnel nga ginaalegar na-involve sa illegal gambling.
Ini matapos ginreklamo ang nasambit nga pulis nga nanghilo ini sang mga manok nga inugbulang sa Colesio De Leganes, Iloilo.
Lakip man diri ang pagpahanumdom nga i-monitor sang kada unit commander ang aktibidad sang ila mga police personnel.
Sa interview sang Bombo Radyo kay Police Liutenant Colonel Arnel Solis, spokesperson sang Police Regional Office 6, iya ginpahayag nga may yara man sang Integrity Monitoring and Enforcement Group nga amo ang may katungdanan sa pagbantay sa mga kapulisan nga involed sa iligal nga buluhaton.
Suno kay Solis, sa tion nga may personnel nga mapamatud-an nga nagatinunto, mahimo gid sila dagdagan sang mga kaso administratibo.
Gin-athag man niya nga kun may mga personnel gid man nga nagakadto sa mga bulangan agud magpatigayon sang intel gathering, kinahanglan sini mag-secure sang nagakaigo nga permission kag authorization sang iya unit commander.
