ILOILO CITY – Wala pa matapos ang ginabalay sang Iloilo City Council nga prangkisa nga nagapahanugot sa United Association of Cockpit Owners and Operators of the Philippines, Incorporated nga magpatigayon sang broadcast delay kag data stream nga online bulang.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang nasambit nga prangkisa nga ginhingyo sang operator, ang indi pa sa gihapon pinal kag sigurado.
Suno kay Treñas, nakit-an nga may pagsalangisag sa mga pagsulundan sang Inter-Agency Taskforce kag Department of the Interior and Local Government (DILG) sa pagpatigayon sang online nga bulang.
Sa Resolution 79 Series of 2020 sang Inter-Agency Taskforce, nakasaad nga subject sa strict observance sang health and safety protcols ang mga bulang.
Indi man pagpahanugutan ang personal nga presensya sang mga audience, ang online kag remote betting ukon pagpustaanay, kag ang live broadcasting ukon telecasting sang cockfights.
Samtang sa Memorandum Circular 2020-140 sang DILG, responsibilidad man sang mga local government unit officials nga i-monitor ang cockfighting operations kag tutukan ang protocol sa no-live streaming and public exhibition.
Ginpahayag sang alkalde nga kun matapos na nga matranscribe ang prangkisa sang operator sa Iloilo City Council, tsikyaron man niya kun mapahunugutan ini kun indi.
Matandaan nga gin-aprubahan na sang Iloilo City Council ang prangkisa nga ginhingyo sang operator nga magpatigayon sang online nga bulang.
Apang ang nasambit nga prangkisa ang yara sa probation ukon subject pa sa kritikal nga eksaminasyon kag evaluation.
