Magalawig tubtub sa Byernes, Abril 25, ang prayer vigil nga ginapatigayon sang Sta. Ana Parish of Molo para kay Pope Francis.
Nag-umpisa ini sang Lunes sang gab-i, Abril 21, nga amo ang una nga gab-i matapos gin-anunsyo sang Vatican nga nagtaliwan na ang 88-anyos nga Santo Papa.
Nagapanguna sa pagpangamuyo si Msgr. Jose Marie Amado Delgado, Parish Team Ministry Moderator, kaupod sa parish personnel kag ministry members.
Antes ang vigil, ang lectors kag ang commentators ministry ang nagapanguna sa pagpangamuyo sa Holy Rosary nga isa ka petisyon para sa intentions ni Pope Francis.
Sa interview sang Bombo Radyo kay Msgr. Delgado, iya ginpahayag nga kun adlaw, mahimo makakadto ang mga tumuluo nga Katoliko sa Parokya agud nga magpangamuyo kag magdala sang bulak, apang nagpahanumdom ini nga ibalik lang ang prayer guide agud magamit man sang iban.
Ang altar ang gin-set up sa Calvario Retablo sa tuo nga bahin sang simbahan nga naga-atubang sa main altar nga naga-feature sang portrait ni Pope Francis.Sa pihak nga bahin, ang Prayer Guide ang ginhanda naman sang Worship Ministry.
Iga-lubong ang Santo Papa sa Sabado nga adlaw, alas kuatro sa hapon oras sa Pilipinas.#
(Photo: Sta. Ana Parish of Molo)
