Nagapasalamat ang Philippine Red Cross – Iloilo Chapter sa mga local government units nga wala naga-untat sa ila nga programa para sa blood donation apisar may COVID-19 pandemic.
Sa interview sang Bombo Radyo kay Katherine Lego, OIC blood center manager sang Philippine Red Cross – Iloilo Chapter, iya ginpahayag nga ini ang labi nga kinahanglanon subong bangud mas manubo ang suplay sa blood center subong nga 2020 ipanggid sang nagligad nga tuig.
Sang 2019 suno kay Lego, may natipon ang Philippine Red Cross – Iloilo Chapter nga 29,000 ka units sang dugo; samtang 20,000 units lang ang natipon halin sang Enero 2020 tubtob subong nga bulan.
Apisar nagnubo ang suplay, wala man nahubsan ang blood center suno kay Lego bangud sa give-and-take relationship sang magkaiping nga mga chapters sa Panay area.
Nagnubo man suno kay Lego ang emergency cases kag ang demand kag posible suno sa iya nga bangud ini sang istrikto nga lockdowns kag curfew.
Subong nga adlaw, Disyembre 11, may patigayunon nga bloodletting activity sa banwa sang Oton nga paga-updan sang local government unit, Dugong Bombo sang Bombo Radyo Philippines, kag Philippine Red Cross.
8:00 sa aga magaumpisa ang aktibidad sa isa ka mall sa nasambit nga banwa.
