ILOILO CITY – Gindeklara ni Iloilo City Mayor Jerry Treñas nga wala sang klase bwas, Hulyo 17 sa mga pribado kag pampubliko nga buluthuan sa syudad sang Iloilo.
Sa exclusive interview sang Bombo Radyo kay Mayor Treñas, iya ginpahayag nga bangud sa posible nga pagbubo sang mamunog nga ulan, ginrekomenda mismo sang City Disaster Risk Reduction and Management Office nga kanselahon ang klase humalin sa pre-school tubtob sa senior high school.
Suno kay Treñas, nakadepende naman sa mga pamunuan sang mga colleges kag universities kun ila kanselahon ang klase ukon indi.
Samtang padayon naman nga nagalibot ang City Engineers Office kag mga District Engineers sang Department of Public Works and Highways agud nga lantawon ang sitwasyon sang syudad kadungan sang pagbaha sa mga mayor nga dalanon.
Pahayag sang alkalde, magapatigayon siya sang pagsinapol kaupod ang mga nasambit nga ahensya sa masunod nga semana agud nga ma-istoryahan kag mahatagan sang solusyon ang nagabaha nga mga dalanon.
Sa pihak nga bahin, wala naman sang klase sa tanan nga lebel sa University of San Agustin; amo man sa St. Therese MTC College sa tanan man nga mga sites.
Wala man klase sa pre-school tubtob senior high school sa pribado kag pampubliko nga buluthuan sa Pavia, Iloilo kag Miag-ao, Iloilo.
Sa Guimbal, Iloilo wala naman sang klase humalin sa day care tubtob secondary level sa pribado kag pampubliko nga buluthuan.
Wala man klase sa San Miguel, Iloilo humalin sa pre-school tubtob secondary level sa pribado kag pampubliko nga buluthuan.
Kag wala man klase sa Dumangas Iloilo humalin pre-school tubtob senior high school sa pribado kag pampubliko nga buluthuan
