Magapadayon ang preliminary investigation sang House Committee on Justice, batok sa impeachment complaints ni Bise Presidente Sara Duterte sa Marso 25, suno kay Batangas Rep. Gerville Luistro.
Paathag ni Luistro nga indi ini isa ka full trial, rason nga limitado lamang ang makatambong sa amo nga hearing.
Suno kay Luistro, ang mga abogado sang complainant, witness kag respondent lamang ang puwede nga maghatag sang advice sa ila kliyente, apang indi sila pagpahanungutan nga mag-itra sa deliberasyon ukon sa pagkwestyon.
Ang mga miyembro sang Justice Committee lamang ang sarang nga makapamangkot kag mag-cross-examine sang mga witnesses.
Kaupod man sa restriction ang mga kongresista nga indi miyembro sang komite.
Dugang pa ni Luistro nga tinutuyo sang preliminary investigation nga imbestigahan ang ebidensya kag hibaluon kun may probable cause agud nga magpadayon ang kaso.
Kun may makit-an nga probable cause, igapasa ini sa bilog nga House of Representatives para sa masunod nga proseso.
