Preparasyon para sa pagbisita ni Pres. Duterte sa haya sang Ilongga OFW, 'in full swing' na

ILOILO CITY – Padayon ang preparasyon sa Barangay Ferraris, Sara, Iloilo para sa pagbisita ni Presidente Rodrigo Duterte sa haya ni Joanna Daniela Demafelis.
Gin-gapas ang mais kag tubo sa palibot sang puluy-an sang pamilya Demafelis.
Gin-bulldoze man ang lugar, agud mahimo mag-park ang mga salakyan kag hugpaan sang chopper.
Una na ginpahayag sa Bombo Radyo Iloilo ni Jonathan Demafelis, manghod ni Joanna, posible nga sa Pebrero 21 ukon 22 magapadulong sa banwa sang Sara ang presidente.
Apang una na nagpadala sang korona si Duterte nga gindul-ong sang Presidential Management Staff (PMS).
Padayon man ang koordinasyon sang PMS kag Presidential Security Group sa mga otoridad kag lokal nga opisyal agud preparahan ang natalana nga pagbisita sang presidente.