ILOILO CITY- Importante ang kooperasyon sang tagsa ka mga manunudlo agud matigayun ang radio based instruction sa pagsugod na sang klase.
Sa interview sang Bombo Radyo kay GL John Haro, Regional Trainor sa Radio based instructions, iya ginpahayag nga indi naman bag-o para sa mga manunudlo ang paghimo sang materials para sa nasambit nga learning modality.
Suno kay Jaro, may yara na nga daan sang campus journalism, radio broadcasting kag school paper sa diin, kalabanan sa mga nagahimo sang modules amo ang mga school paper adviser.
Samtang, ginpahayag naman ni Dr. Nestor Paul Pingil, educational program supervisor, nga madamo sila sang pagpanghangkat nga ginahandaan sa pagpatuman sang radio kag TV based instructions.
Suno kay Pingil lakip sa mga pagpanghangkat amo ang electrical connections sa tion nga may yara sang brownout, lakip na ang signal sa tion nga ipatuman na ang nasambit nga modality.
Ginpahayag sang natungdan may yara naman sila sang naplastar nga mga plano agud matigayun sa gihapon ang pagtuon kag pagtudlo sa mga kabataan apisar may yara sang pila ka mga pagpanghangkat.
