Nagpanindugan si President Ferdinand “Bongbong” Marcos Jr. nga wala sang blank pages sa bicameral conference committee report sang 2025 national budget.
Kadungan sang speech ni Marcos sa 20th National Convention of Lawyers in Cebu City, ginpahayag sini nga gin-analisar kag ginbasa niya ang 4,057 pages sang General Appropriations Act (GAA) para sa 2025.
Nahibaluan nga sang Disyembre 30 sang nagligad nga tuig ginpirmahan sang presidente nga mangin layi ang P6.326-trilyon nga national budget para sa 2025 kag gin-veto ang masobra P194 billion nga balor sang mga line items apisar wala nagasanto sa prayoridad sang iya administrasyon.
Una na nga ginbuyagyag ni anay President Rodrigo Duterte kag Davao City 3rd District Representative Isidro Ungab ang mga ginapatihan discrepancies sa 2025 budget.
Pero, ginpahayag ni Marcos nga “nagabinutig” si Duterte.
Ang anay executive secretary kag senatorial aspirant nga si Vic Rodriguez, Ungab, kag iban pa naghingyo sa Korte Suprema (SC) nga ideklarar ang 2025 national budget bilang unconstitutional sa tunga sang gina-alegar nga mga iregularidad kag ginapahayag blangko nga mga butang sa bicameral conference committee report.
Sang Lunes, ginkumpirmar sang acting chairperson sang House of Representatives Committee on Appropriations nga si Stella Quimbo nga may mga blangko nga mga butang sa bicameral report sa P6.325 trillion nga national budget para sa 2025. Apang madasig niya nga gindugang nga ang pondo para sa amo nga mga butang ang natumod na antes pa man ginpirmahan ang report.
Samtang, ginpahayag naman ni Executive Secretary Lucas Bersamin sang nagligad nga semana nga indi manabat ang Office of the President kon ipasaka ang isyu sa Supreme Court.
